Opgewik
Afgewend
Wreedaardig
Wraakagtig
ʼn Wrok
ʼn Wrak
Van ʼn lewe
Oor gegee aan drank
En maklike geld
Wat sy elke maklike dag
Maklik maak
Uit somtyds soveel as drie maklike mans
Se maklike penise
Maar dit voel mos nie so gemaklik nie
Wanneer sy haar maklik-gemaakte geld
Moet verruil
Vir haar daglikse retoerkaartjie
Tot diep onder in die bottle
Waar sy haar
Ongemaklike siel
Moet loop en soek
Haai shame tog
Die arme ding
Is diep weg gekruip
In ʼn hoek
En hier by die toonbank
In ʼn bar
Staan nog ʼn ou
Wat dink hy ken haar
Wat sê hy sien haar
En dat hy graag al haar
Lewens verhaal shit
Wil skryf in ʼn boek
Asof hy nie
Die eerste ou is
Wat dop vir ʼn alkoholis koop nie
En sê hy wil haar storie vertel
Ou Tinkerbell
In haar gemaklike hel
Waar alkohol se blou vlam
Haar kaal brand en dan ontvel
En dan is dit more
En nou is nog ʼn dag
Oppad na haar maklike werk toe
ʼn Verkeersophoping
Met maklik verlore vrag
Tannie met CY plate
Vat ʼn kans
(Soos dit maar met CY en CF gaan)
En sny haar af
Minwetend dat Tinkerbell
Vandag lus is
Vir byt en nie blaf
Opgewik
Afgewend
Wreedaardig
Wraakagtig
ʼn Wrok
ʼn Wrak van ʼn lewe
Wat homself nou uit speel
Tussen pad se strepe
Van wit, swart en geel
Gewoonlik word ʼn messteekery mos
Nie aan bevel
Maar wie gaan vanoggend
Vir ʼn Tinkerbell
Met moord in haar oë sê
Hoe om met haar emosies te teel?
Opgewik
Afgewend
Wreedaardig
Wraakagtig
ʼn Wrok
ʼn Wrak van ʼn lewe
Die blou alkohol vlam
Verruil vir ʼn sel
Vir die eerste keer
In ʼn baie lang ruk
Gaan dit actually
Met haar
Wel